ਵਿੱਤੀ ਯੋਜਨਾ
ਬੱਜਟ 2026 ਅਨੁਸ਼ਾਸਿਤ ਫੈਸਲਿਆਂ ‘ਤੇ ਅਧਾਰਿਤ ਹੈ, ਤਾਂ ਜੋ ਮਹੱਤਵਪੂਰਨ ਸੇਵਾਵਾਂ ਦੀ ਸੁਰੱਖਿਆ ਕੀਤੀ ਜਾਵੇ ਅਤੇ ਲੰਬੇ ਸਮੇਂ ਦੇ ਵਿੱਤੀ ਬਿਓਰੇ ਨੂੰ ਸੁਧਾਰਦੇ ਹੋਏ ਬੀ.ਸੀ. ਦੀ ਆਰਥਿਕਤਾ ਨੂੰ ਵਧਾਉਣ ਲਈ ਟੀਚਾਬੱਧ ਨਿਵੇਸ਼ ਕੀਤੇ ਜਾਣ।
ਇਸ ਪੰਨੇ ‘ਤੇ
ਅਨਿਸ਼ਚਿਤ ਆਰਥਿਕ ਸਮੇਂ ਵਿੱਚ, ਬੱਜਟ 2026 ਦਾ ਟੀਚਾ ਹੈ ਕਿ ਹੋਰ ਲੋਕਾਂ ਨੂੰ ਵਧੀਆ ਨੌਕਰੀਆਂ ਲਈ ਤਿਆਰ ਕਰਕੇ, ਪ੍ਰਾਈਵੇਟ ਅਤੇ ਫੈਡਰਲ ਨਿਵੇਸ਼ ਆਕਰਸ਼ਿਤ ਕਰਕੇ, ਅਤੇ ਨਵੀਨਤਾ ਨੂੰ ਅੱਗੇ ਵਧਾ ਕੇ ਆਰਥਿਕਤਾ ਨੂੰ ਭਵਿੱਖ ਵਿੱਚ ਚੁਣੌਤੀਆਂ ਪ੍ਰਤੀ ਮਜ਼ਬੂਤ ਬਣਾਇਆ ਜਾਵੇ।
ਬੱਜਟ ਦਾ ਉਦੇਸ਼ ਟੈਕਸ ਵਿਵਸਥਾ ਵਿੱਚ ਤਬਦੀਲੀਆਂ ਰਾਹੀਂ ਸਰਕਾਰ ਲਈ ਆਮਦਨ ਵਧਾਉਣਾ ਹੈ; ਇਹ ਪ੍ਰੋਗਰਾਮਾਂ ਨੂੰ ਹੋਰ ਕੁਸ਼ਲ ਬਣਾਉਂਦੇ ਹੋਏ, ਖ਼ਰਚੇ ਘਟਾਉਂਦੇ ਹੋਏ, ਅਤੇ ਉਨ੍ਹਾਂ ਸੇਵਾਵਾਂ ਨੂੰ ਸੁਰੱਖਿਅਤ ਕਰਦਿਆਂ ਕੀਤਾ ਜਾਵੇਗਾ, ਜਿਨ੍ਹਾਂ ‘ਤੇ ਲੋਕ ਨਿਰਭਰ ਹਨ।
ਬੱਜਟ 2026, ਅੱਠ ਸਾਲਾਂ ਦੇ ਤੇਜ਼ ਨਿਰਮਾਣ ਤੋਂ ਬਾਅਦ, ਪੂੰਜੀ ਯੋਜਨਾ ਦੀ ਗਤੀ ਨੂੰ ਨਵੇਂ ਸਿਰੀਓਂ ਤੈਅ ਕਰਦਾ ਹੈ, ਤਾਂ ਜੋ ਇਸਦੀ ਲੰਬੇ ਸਮੇਂ ਦੀ ਸਥਿਰਤਾ ਨੂੰ ਯਕੀਨੀ ਬਣਾਇਆ ਜਾ ਸਕੇ।
ਆਉਣ ਵਾਲੇ ਸਮੇਂ ਵਿੱਚ ਆਰਥਿਕਤਾ ਦਾ ਅਨੁਮਾਨਿਤ ਬਿਓਰਾ
ਬੀ.ਸੀ. ਵਿੱਚ ਆਰਥਿਕ ਵਾਧੇ ਦੀ ਗਤੀ ਧੀਮੀ ਤੋਂ ਦਰਮਿਆਨੀ ਰਹਿਣ ਦੀ ਉਮੀਦ ਹੈ। ਵਪਾਰ ਸੰਬੰਧੀ ਅਨਿਸ਼ਚਿਤਤਾ ਦੇ ਜਾਰੀ ਰਹਿਣ ਅਤੇ ਫੈਡਰਲ ਸਰਕਾਰ ਵੱਲੋਂ ਇਮੀਗ੍ਰੇਸ਼ਨ ਨੀਤੀ ਵਿੱਚ ਕੀਤੀਆਂ ਤਬਦੀਲੀਆਂ ਦੇ ਪ੍ਰਭਾਵਾਂ ਕਾਰਨ ਅਸਲ ਕੁੱਲ ਘਰੇਲੂ ਉਤਪਾਦ ਵਿੱਚ ਵਾਧਾ ਸਾਲ 2026 ਵਿੱਚ 1.3%, ਅਤੇ 2027 ਵਿੱਚ 1.8% ਰਹਿਣ ਦਾ ਅਨੁਮਾਨ ਹੈ। ਆਰਥਿਕ ਵਿਕਾਸ ਵਿੱਚ ਮੱਧ ਮਿਆਦ (2028–2030) ਵਿੱਚ ਸੁਧਾਰ ਹੋਣ ਦੀ ਉਮੀਦ ਹੈ, ਅਤੇ ਜਦੋਂ ਇਮੀਗ੍ਰੇਸ਼ਨ ਪੱਧਰ ਮੁੜ ਸਧਾਰਨ ਪੱਧਰਾਂ ‘ਤੇ ਆ ਜਾਣਗੇ ਅਤੇ ਵਪਾਰ ਨਾਲ ਜੁੜੀ ਅਨਿਸ਼ਚਿਤਤਾ ਘਟੇਗੀ, ਤਾਂ ਸਲਾਨਾ ਔਸਤ ਵਾਧਾ 2.1% ਰਹਿਣ ਦਾ ਅੰਦਾਜ਼ਾ ਹੈ।
ਆਉਣ ਵਾਲੇ ਸਮੇਂ ਵਿੱਚ ਬੱਜਟ ਦਾ ਅਨੁਮਾਨਿਤ ਬਿਓਰਾ
ਬੱਜਟ 2026 ਸਾਲ 2025–26 ਲਈ $9.6 ਬਿਲੀਅਨ ਦਾ ਅੱਪਡੇਟ ਕੀਤਾ ਘਾਟਾ ਪੇਸ਼ ਕਰਦਾ ਹੈ, ਜੋ ਦੂਜੀ ਤਿਮਾਹੀ ਰਿਪੋਰਟ ਵਿੱਚ ਦਰਸਾਏ ਅਨੁਮਾਨ ਨਾਲੋਂ $1.6 ਬਿਲੀਅਨ ਘੱਟ ਹੈ। ਇਸ ਸੁਧਾਰ ਦਾ ਮੁੱਖ ਕਾਰਨ ਕਾਰਪੋਰੇਟ ਅਤੇ ਪ੍ਰਾਈਵੇਟ ਇਨਕਮ ਟੈਕਸ ਤੋਂ ਵੱਧੀ ਹੋਈ ਆਮਦਨ ਅਤੇ ਰੀਫੰਡੇਬਲ ਟੈਕਸ ਕ੍ਰੈਡਿਟਾਂ ‘ਤੇ ਘੱਟ ਖ਼ਰਚ ਹੈ। ਸਾਲ 2025–26 ਦੇ ਵਿੱਤੀ ਸਾਲ ਦੇ ਅਨੁਮਾਨ ਨੂੰ ਇੱਕ ਵਾਰੀ ਦੇ $2.7 ਬਿਲੀਅਨ ਤਮਾਕੂ ਨਿਪਟਾਰੇ (ਸੈਟਲਮੈਂਟ) ਤੋਂ ਵੀ ਫ਼ਾਇਦਾ ਹੁੰਦਾ ਹੈ, ਜਿਸ ਨਾਲ ਅਨੁਮਾਨਿਤ ਘਾਟੇ ਵਿੱਚ ਗਿਰਾਵਟ ਆਉਂਦੀ ਹੈ।
ਬੱਜਟ 2026 ਅਗਲੇ ਤਿੰਨ ਸਾਲਾਂ ਦੀ ਵਿੱਤੀ ਯੋਜਨਾ ਲਈ ਘਾਟੇ ਵਿੱਚ ਹੇਠਾਂ ਦਿੱਤੀ ਗਿਰਾਵਟ ਦਰਸਾਉਂਦਾ ਹੈ:
- ਸਾਲ 2026–27 ਲਈ $13.3 ਬਿਲੀਅਨ
- ਸਾਲ 2027–28 ਲਈ $12.2 ਬਿਲੀਅਨ
- ਸਾਲ 2028–29 ਲਈ $11.4 ਬਿਲੀਅਨ
ਘਾਟਿਆਂ ਵਿੱਚ ਹੋਣ ਵਾਲੀ ਇਸ ਗਿਰਾਵਟ ਦੇ ਨਤੀਜੇ ਵਜੋਂ, ਸਰਕਾਰ ਦਾ ਘਾਟੇ ਤੋਂ ਕੁੱਲ ਘਰੇਲੂ ਉਤਪਾਦ ਅਨੁਪਾਤ ਅਗਲੇ ਤਿੰਨ ਸਾਲਾਂ ਵਿੱਚ ਘਟ ਰਿਹਾ ਹੈ; ਸਾਲ 2026–27 ਵਿੱਚ 2.9% ਤੋਂ ਘਟ ਕੇ 2028–29 ਤੱਕ 2.3%।
ਆਉਣ ਵਾਲੇ ਸਮੇਂ ਵਿੱਚ ਆਮਦਨ ਦਾ ਅਨੁਮਾਨਿਤ ਬਿਓਰਾ
ਕੁੱਲ ਸਰਕਾਰੀ ਆਮਦਨ 2026–27 ਵਿੱਚ $85.5 ਬਿਲੀਅਨ, 2027–28 ਵਿੱਚ $88.6 ਬਿਲੀਅਨ ਅਤੇ 2028–29 ਵਿੱਚ $91.8 ਬਿਲੀਅਨ ਹੋਣ ਦਾ ਅਨੁਮਾਨ ਹੈ। ਇਹ ਵਾਧਾ ਮੁੱਖ ਤੌਰ ‘ਤੇ ਟੈਕਸ ਆਮਦਨ ਵਧਾਉਣ ਕਾਰਨ ਹੈ, ਜਿਸ ਦਾ ਇੱਕ ਹਿੱਸਾ ਨਵੇਂ ਉਪਾਅ ਲਾਗੂ ਕਰਨ ਨਾਲ, ਕੁਦਰਤੀ ਸਰੋਤਾਂ ਤੋਂ ਆਮਦਨ ਅਤੇ ਵਪਾਰਕ ਕ੍ਰਾਊਨ ਕਾਰਪੋਰੇਸ਼ਨਾਂ ਦੀ ਕੁੱਲ ਆਮਦਨ ਕਾਰਨ ਹੈ।
ਆਉਣ ਵਾਲੇ ਸਮੇਂ ਵਿੱਚ ਸਰਕਾਰ ਦੀ ਆਮਦਨ ਦੇ ਅਨੁਮਾਨਿਤ ਬਿਓਰੇ ਵਿੱਚ ਅਮਰੀਕੀ ਟੈਰਿਫ਼ਾਂ ਕਾਰਨ ਵਪਾਰ ਸਬੰਧੀ ਅਨਿਸ਼ਚਿਤਤਾ ਨੂੰ ਵੀ ਸ਼ਾਮਲ ਕੀਤਾ ਗਿਆ ਹੈ।
ਆਉਣ ਵਾਲੇ ਸਮੇਂ ਵਿੱਚ ਹੋਣ ਵਾਲੇ ਅਨੁਮਾਨਿਤ ਖ਼ਰਚਿਆਂ ਦਾ ਬਿਓਰਾ
ਤਿੰਨ ਸਾਲਾਂ ਦੀ ਵਿੱਤੀ ਯੋਜਨਾ ਦੌਰਾਨ 2026-27 ਵਿੱਚ ਖ਼ਰਚੇ $98.8 ਬਿਲੀਅਨ, 2027-28 ਵਿੱਚ $100.7 ਬਿਲੀਅਨ, ਅਤੇ 2028-29 ਵਿੱਚ $103.2 ਬਿਲੀਅਨ ਹੋਣ ਦਾ ਅਨੁਮਾਨ ਹੈ। ਇਹ ਨਿਵੇਸ਼ ਉਨ੍ਹਾਂ ਮਹੱਤਵਪੂਰਨ ਪ੍ਰੋਗਰਾਮਾਂ ਅਤੇ ਸੇਵਾਵਾਂ ਨੂੰ ਬਰਕਰਾਰ ਰੱਖਣ ਵਿੱਚ ਮਦਦ ਕਰਨਗੇ ਜਿਨ੍ਹਾਂ ‘ਤੇ ਲੋਕ ਨਿਰਭਰ ਹਨ, ਜਿਸ ਵਿੱਚ ਸਿਹਤ ਸੰਭਾਲ, ਬੱਚਿਆਂ ਅਤੇ ਨੌਜਵਾਨਾਂ ਲਈ ਸਹਾਇਤਾਵਾਂ ਅਤੇ ਜਨਤਕ ਸੁਰੱਖਿਆ ਸ਼ਾਮਲ ਹੈ, ਨਾਲ ਹੀ ਹੁਨਰ ਸਿਖਲਾਈ ਲਈ ਮੌਕਿਆਂ ਵਿੱਚ ਵਾਧਾ ਕਰਨਾ ਅਤੇ ਬੀ.ਸੀ. ਦਾ ਆਰਥਿਕ ਭਵਿੱਖ ਮਜ਼ਬੂਤ ਕਰਨਾ ਵੀ ਸ਼ਾਮਲ ਹੈ।
ਬੱਜਟ 2026 ਵਿੱਚ ਵਿੱਤੀ ਯੋਜਨਾ ਦੇ ਹਰ ਸਾਲ ਲਈ $5 ਬਿਲੀਅਨ ਦੀ ਕੰਟਿਨਜੈਂਸੀ ਰਕਮ ਰੱਖੀ ਗਈ ਹੈ, ਤਾਂ ਜੋ ਕੇਸਾਂ ਦੇ ਦਬਾਅ, ਮੌਜੂਦਾ ਸਾਂਝੀ ਬਾਰਗੇਨਿੰਗ ਮੈਨਡੇਟ ਨਾਲ ਸੰਬੰਧਤ ਲਾਗਤਾਂ, ਅਤੇ ਅਜਿਹੇ ਹੋਰ ਖ਼ਰਚੇ, ਜੋ ਬੱਜਟ ਤਿਆਰ ਕਰਦੇ ਸਮੇਂ ਅਨਿਸ਼ਚਿਤ ਹੁੰਦੇ ਹਨ, ਦਾ ਪ੍ਰਬੰਧਨ ਕਰਨ ਵਿੱਚ ਮਦਦ ਮਿਲੇ। ਇਸ ਵਿੱਚ ਲਗਾਤਾਰ ਵਪਾਰਕ ਅਨਿਸ਼ਚਿਤਤਾ ਨਾਲ ਨਜਿੱਠਣਾ, ਐਮਰਜੈਂਸੀ ਪ੍ਰਤਿਕਿਰਿਆ ਅਤੇ ਹੜ੍ਹਾਂ ਦੇ ਪ੍ਰਭਾਵਾਂ ਨੂੰ ਘਟਾਉਣ ਵਰਗੇ ਉਪਰਾਲੇ ਵੀ ਸ਼ਾਮਲ ਹਨ।
ਪੂੰਜੀ ਨਿਵੇਸ਼
ਬੱਜਟ 2026 ਤਿੰਨ ਸਾਲਾਂ ਦੌਰਾਨ ਟੈਕਸ ਅਦਾ ਕਰਨ ਵਾਲਿਆਂ ਤੋਂ ਪ੍ਰਾਪਤ ਪੂੰਜੀ ਵਿੱਚੋਂ ਕੁੱਲ $37.7 ਬਿਲੀਅਨ ਦਾ ਨਿਵੇਸ਼ ਕਰਦਾ ਹੈ, ਜਿਸ ਵਿੱਚ ਲੋਕਾਂ ਦੀ ਆਵਾਜਾਈ ਅਤੇ ਮਾਲ ਦੀ ਢੋਆ-ਢੁਆਈ ਨੂੰ ਸੁਚਾਰੂ ਰੱਖਣ ਲਈ ਟ੍ਰਾਂਜ਼ਿਟ ਅਤੇ ਢੋਆ-ਢੁਆਈ ਸੰਬੰਧੀ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨ ਲਈ $13.8 ਬਿਲੀਅਨ, ਨਵੀਆਂ ਅਤੇ ਸੁਧਾਰ ਕੀਤੀਆਂ ਸਿਹਤ ਸਹੂਲਤਾਂ ਦੇ ਨਿਰਮਾਣ ਨੂੰ ਸਹਿਯੋਗ ਦੇਣ ਲਈ $11.1 ਬਿਲੀਅਨ, ਅਤੇ ਸਕੂਲਾਂ ਦੇ ਨਿਰਮਾਣ, ਨਵੀਨੀਕਰਣ ਅਤੇ ਭੂਚਾਲ ਤੋਂ ਸੁਰੱਖਿਆ ਦੇ ਸੁਧਾਰਾਂ ਲਈ $3.9 ਬਿਲੀਅਨ ਸ਼ਾਮਲ ਹਨ।
ਵਪਾਰਕ ਕ੍ਰਾਊਨ ਕਾਰਪੋਰੇਸ਼ਨਾਂ ਵੱਲੋਂ ਆਪਣੇ ਸਰੋਤਾਂ ਨਾਲ ਕੀਤਾ ਗਿਆ ਪੂੰਜੀ ਖ਼ਰਚ ਤਿੰਨ ਸਾਲਾਂ ਦੌਰਾਨ $15.3 ਬਿਲੀਅਨ ਹੋਣ ਦਾ ਅਨੁਮਾਨ ਹੈ, ਜੋ ਮੁੱਖ ਤੌਰ ‘ਤੇ ਬਿਜਲੀ ਉਤਪਾਦਨ ਅਤੇ ਟ੍ਰਾਂਸਮਿਸ਼ਨ ਲਈ ਹੈ।
ਕਰਜ਼ਾ ਬਰਦਾਸ਼ਤ ਕਰਨ ਦੀ ਹੱਦ
ਬੀ.ਸੀ. ਦੇ ਟੈਕਸ ਭੁਗਤਾਨ ਕਰਨ ਵਾਲਿਆਂ ‘ਤੇ ਅਧਾਰਿਤ ਕਰਜ਼ਾ, 2025-26 ਦੇ ਅੰਤ ਤੱਕ, $116.5 ਬਿਲੀਅਨ ਹੋਣ ਦਾ ਅਨੁਮਾਨ ਹੈ, ਜੋ ਬੱਜਟ 2025 ਵਿੱਚ ਦਰਸਾਏ ਗਏ ਅਨੁਮਾਨ ਨਾਲੋਂ ਲਗਭਗ $2.2 ਬਿਲੀਅਨ ਘੱਟ ਹੈ। ਅਜਿਹਾ ਇੱਕ ਬਿਹਤਰ ਪ੍ਰਬੰਧਕੀ ਨਤੀਜੇ ਅਤੇ ਪੂੰਜੀ ਖ਼ਰਚ ਘੱਟ ਹੋਣ ਕਾਰਨ ਹੋਇਆ ਹੈ। ਇਸ ਘੱਟ ਅਨੁਮਾਨ ਨਾਲ, ਕਰਜ਼ੇ-ਤੋਂ-ਕੁੱਲ ਘਰੇਲੂ ਉਤਪਾਦ ਅਨੁਪਾਤ ਦਾ ਹੁਣ 2025-26 ਲਈ 26.1% ਹੋਣ ਦਾ ਅਨੁਮਾਨ ਹੈ, ਜੋ ਦੂਜੇ ਤਿਮਾਹੀ ਦੇ ਅੰਤ ਦੇ 26.4% ਅੰਕੜੇ ਤੋਂ ਘੱਟ ਹੈ।
ਵਿੱਤੀ ਯੋਜਨਾ ਦੌਰਾਨ ਟੈਕਸ ਭੁਗਤਾਨ ਕਰਨ ਵਾਲਿਆਂ ‘ਤੇ ਅਧਾਰਿਤ ਕਰਜ਼ੇ ਦੇ $189 ਬਿਲੀਅਨ ਤੱਕ ਵਧਣ ਦੀ ਉਮੀਦ ਹੈ, ਕਿਉਂਕਿ ਸੂਬਾ ਮਹੱਤਵਪੂਰਨ ਸੇਵਾਵਾਂ ਦੀ ਸੁਰੱਖਿਆ ਕਰਨ ਅਤੇ ਸਕੂਲਾਂ, ਸੜਕਾਂ, ਹਸਪਤਾਲਾਂ ਅਤੇ ਟ੍ਰਾਂਜ਼ਿਟ ਦੇ ਨਿਰਮਾਣ ਵਿੱਚ ਨਿਵੇਸ਼ ਜਾਰੀ ਰੱਖਦਾ ਹੈ।
ਟੈਕਸ ਅਦਾ ਕਰਨ ਵਾਲਿਆਂ ਦੁਆਰਾ ਸਮਰਥਿਤ ਕਰਜ਼ੇ-ਤੋਂ-ਕੁੱਲ ਘਰੇਲੂ ਉਤਪਾਦ ਅਨੁਪਾਤ, ਜੋ ਕ੍ਰੈਡਿਟ ਰੇਟਿੰਗ ਏਜੰਸੀਆਂ ਵੱਲੋਂ ਵਰਤਿਆ ਜਾਣ ਵਾਲਾ ਇੱਕ ਮਹੱਤਵਪੂਰਨ ਮਾਪਦੰਡ ਹੈ, 2026-27 ਵਿੱਚ 30.6%, 2027-28 ਵਿੱਚ 34.4% ਅਤੇ 2028-29 ਵਿੱਚ 37.4% ਹੋਣ ਦਾ ਅਨੁਮਾਨ ਹੈ। ਬੀ.ਸੀ. ਦਾ ਕੁੱਲ ਦੇਣਦਾਰੀਆਂ-ਤੋਂ-ਜੀ.ਡੀ.ਪੀ. ਅਨੁਪਾਤ ਕੈਨੇਡਾ ਵਿੱਚ ਸਭ ਤੋਂ ਘੱਟ ਅਨੁਪਾਤਾਂ ਵਿੱਚੋਂ ਇੱਕ ਰਹਿਣਾ ਜਾਰੀ ਹੈ। ਇਹ ਇਸ ਵੇਲੇ ਓਨਟਾਰਿਓ ਅਤੇ ਕਿਊਬੈਕ ਸਮੇਤ ਜ਼ਿਆਦਾਤਰ ਸੂਬਿਆਂ ਨਾਲੋਂ ਘੱਟ ਹੈ। ਬੀ.ਸੀ. ਦੀਆਂ ਕਰਜ਼ੇ ਦੀਆਂ ਲਾਗਤਾਂ ਹੋਰ ਅਧਿਕਾਰ ਖੇਤਰਾਂ ਦੇ ਮੁਕਾਬਲੇ ਹਾਲੇ ਵੀ ਘੱਟ ਪੱਧਰ ‘ਤੇ ਹਨ।
ਬੱਜਟ 2026 ਕਾਰਜਨੀਤਕ ਤੌਰ ‘ਤੇ ਪੂੰਜੀ ਯੋਜਨਾ ਦੀ ਕ੍ਰਮਬੱਧਤਾ, ਅਨੁਸ਼ਾਸਿਤ ਫ਼ੈਸਲੇ ਲੈਣ ਅਤੇ ਟੀਚੇਬੱਧ ਨਿਵੇਸ਼ ਕਰਨ ‘ਤੇ ਧਿਆਨ ਕੇਂਦਰਿਤ ਕਰਦਾ ਹੈ, ਤਾਂ ਜੋ ਸਮੇਂ ਦੇ ਨਾਲ ਘਾਟੇ ਵਿੱਚ ਗਿਰਾਵਟ ਲਿਆਂਦੀ ਜਾ ਸਕੇ, ਅਤੇ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਬੀ.ਸੀ. ਹੋਰ ਸੂਬਿਆਂ ਦੀ ਤੁਲਨਾ ਵਿੱਚ, ਆਪਣੇ ਕੁੱਲ ਦੇਣਦਾਰੀਆਂ-ਤੋਂ-ਜੀ.ਡੀ.ਪੀ. ਅਨੁਪਾਤ ਵਿੱਚ ਮੁਕਾਬਲੇਯੋਗ ਸਥਿਤੀ ਬਣਾਈ ਰੱਖੇ।